പേരാവൂർ : ജനങ്ങളുടെ ആരോഗ്യ സംരക്ഷണം ഒരു സർക്കാരിന്റെ അടിസ്ഥാന ഉത്തരവാദിത്തങ്ങളിലൊന്നാണല്ലോ , പ്രത്യേകിച്ച് ഗ്രാമപ്രദേശങ്ങളിലും മലനിരകളോട് ചേർന്ന പ്രദേശങ്ങളിലും താമസിക്കുന്ന സാധാരണക്കാരും ആദിവാസി ജനവിഭാഗങ്ങളും മികച്ച ആരോഗ്യ സേവനം ലഭിക്കാതെ ബുദ്ധിമുട്ടുന്ന സാഹചര്യത്തിൽ, പൊതുജനാരോഗ്യ സംവിധാനങ്ങളുടെ ശക്തീകരണം അനിവാര്യമായി മാറുകയാണ്. ഈ സാഹചര്യത്തിലാണ് പേരാവൂർ താലൂക്ക് ആശുപത്രിയുടെ നിർമ്മാണ പ്രവർത്തനങ്ങൾ എത്രയും വേഗം പൂർത്തിയാക്കേണ്ടതിന്റെ പ്രാധാന്യം ഉയർന്നുവരുന്നത്.
പേരാവൂർ മേഖലയിലെ ആയിരക്കണക്കിന് ആളുകൾ സർക്കാർ ആശുപത്രി സേവനങ്ങളെയാണ് പ്രധാനമായും ആശ്രയിക്കുന്നത്. സാമ്പത്തികമായി പിന്നാക്കം നിൽക്കുന്ന കുടുംബങ്ങൾക്കും, ആറളം ഫാം പുനരധിവാസ മേഖലകളിൽ താമസിക്കുന്ന ആദിവാസി സമൂഹങ്ങൾക്കും സ്വകാര്യ ആശുപത്രികളിലെ ചെലവേറിയ ചികിത്സ ലഭ്യമാക്കുന്നത് ഏറെ പ്രയാസകരമാണ്. അതുകൊണ്ടുതന്നെ, എല്ലാ ആധുനിക സൗകര്യങ്ങളോടും കൂടിയ ഒരു താലൂക്ക് ആശുപത്രി ഇവിടുത്തെ ജനങ്ങളുടെ ദീർഘകാല ആവശ്യമാണ്.2019 ൽ അന്നത്തെ ആരോഗ്യ മന്ത്രിയായിരുന്ന കെ കെ ശൈലജ ടീച്ചർ തറക്കല്ലിട്ട് സൂപ്പർ സ്പെഷ്യാലിറ്റി ആശുപത്രി ആക്കി രണ്ടുവർഷംകൊണ്ട് പൂർത്തീകരിക്കും എന്ന് വാഗ്ദാനം ചെയ്ത പേരാവൂർ താലൂക്ക് ആശുപത്രിയുടെ നിർമ്മാണ പ്രവർത്തി ഇപ്പോഴും മന്ദഗതിയിലാണ് പൊയ്ക്കൊണ്ടിരിക്കുന്നത് . ഇത് രോഗികൾക്ക് വലിയ ബുദ്ധിമുട്ടുകളാണ് സൃഷ്ടിക്കുന്നത്. അടിയന്തര ചികിത്സ ആവശ്യമായ സാഹചര്യങ്ങളിൽ ദൂരെയുള്ള ആശുപത്രികളെ ആശ്രയിക്കേണ്ടിവരുന്നത് പലപ്പോഴും ജീവൻ പോലും അപകടത്തിലാക്കുന്നു. ഗർഭിണികൾ, വയോധികർ, കുട്ടികൾ, അപകടത്തിൽപ്പെടുന്നവർ തുടങ്ങി നിരവധി വിഭാഗങ്ങൾ സമയബന്ധിത ചികിത്സ ലഭിക്കാതെ ദുരിതമനുഭവിക്കുകയാണ്.
പേരാവൂർ പോലുള്ള മലയോര മേഖലയിലെ ആരോഗ്യ സേവനങ്ങൾ ശക്തിപ്പെടുത്തുന്നത് ഒരു വികസനപ്രവർത്തനം മാത്രമല്ല, സാമൂഹ്യനീതിയുടെ ഭാഗവുമാണ്. ആദിവാസി സമൂഹങ്ങൾ ഉൾപ്പെടെയുള്ള പിന്നാക്കവിഭാഗങ്ങൾക്കും ഗുണമേൻമയുള്ള ചികിത്സാ സൗകര്യം ലഭിക്കേണ്ടതായിട്ടുണ്ട്. സർക്കാർ ആശുപത്രികൾ ശക്തിപ്പെട്ടാൽ സാധാരണ ജനങ്ങൾക്ക് സാമ്പത്തിക ഭാരം കുറയുകയും ആരോഗ്യരംഗത്ത് കൂടുതൽ വിശ്വാസം വളരുകയും ചെയ്യും.അതുകൊണ്ട് തന്നെ പേരാവൂർ താലൂക്ക് ആശുപത്രിയുടെ നിർമ്മാണ പ്രവർത്തനങ്ങൾ യുദ്ധകാലാടിസ്ഥാനത്തിൽ പൂർത്തീകരിച്ച് ആവശ്യമായ ഡോക്ടർമാരും ജീവനക്കാരും ആധുനിക ചികിത്സാ സംവിധാനങ്ങളും ഉടൻ ഒരുക്കണമെന്ന് വിനീതമായി അഭ്യർത്ഥിക്കുന്നു.ജനങ്ങളുടെ പ്രതീക്ഷകൾക്ക് അനുസരിച്ച് പേരാവൂർ താലൂക്ക് ആശുപത്രി പൂർണ സജ്ജമാക്കി പ്രവർത്തനം ആരംഭിക്കാൻ പുതുതായി കേരളത്തിൽ ഭരണം ഏറ്റെടുത്ത ഗവൺമെന്റിന് സാധിക്കും.
Content Highlight: Peravoorthalukhospital
