വാട്സ്ആപ്പ് യൂസർനെയിം ഫീച്ചറിന് കേന്ദ്രത്തിന്റെ 'റെഡ് സിഗ്നൽ': വൻ തട്ടിപ്പുകൾക്ക് വഴിവെക്കുമെന്ന് മുന്നറിയിപ്പ്

ന്യൂഡൽഹി: ഫോൺ നമ്പറുകൾ പരസ്യമാക്കാതെ തന്നെ മറ്റുള്ളവരുമായി ചാറ്റ് ചെയ്യാൻ സഹായിക്കുന്ന വാട്സ്ആപ്പിന്റെ പുതിയ 'യൂസർനെയിം' (Username) ഫീച്ചർ ഇന്ത്യയിൽ അവതരിപ്പിക്കുന്നത് താൽക്കാലികമായി നിർത്തിവെക്കാൻ കേന്ദ്രസർക്കാർ നിർദേശം നൽകി. ഉപയോക്താക്കളുടെ സ്വകാര്യത വർദ്ധിപ്പിക്കാൻ ലക്ഷ്യമിട്ട് മെറ്റ കൊണ്ടുവരുന്ന ഈ ഫീച്ചർ, രാജ്യത്ത് വൻതോതിലുള്ള സൈബർ തട്ടിപ്പുകൾക്കും വ്യാജ അക്കൗണ്ടുകളുടെ പെരുപ്പത്തിനും കാരണമാകുമെന്ന ശക്തമായ മുന്നറിയിപ്പുകളെ തുടർന്നാണ് സർക്കാരിന്റെ അടിയന്തര ഇടപെടൽ.

ഇതുസംബന്ധിച്ച് കേന്ദ്രസർക്കാർ മെറ്റയ്ക്ക് നോട്ടീസ് അയച്ചിട്ടുണ്ട്. വിഷയത്തിൽ കൃത്യമായ കൂടിയാലോചനകൾ പൂർത്തിയാകുന്നത് വരെ ഈ ഫീച്ചർ ഇന്ത്യയിൽ നടപ്പിലാക്കരുതെന്നും, മൂന്ന് ദിവസത്തിനകം ഇതുമായി ബന്ധപ്പെട്ട റിപ്പോർട്ട് സമർപ്പിക്കണമെന്നും നോട്ടീസിൽ ആവശ്യപ്പെടുന്നു. ഇന്ത്യയിൽ മാത്രം 50 കോടിയിലധികം ഉപഭോക്താക്കളുള്ള വാട്സ്ആപ്പിലെ ഇത്തരം മാറ്റങ്ങൾ രാജ്യസുരക്ഷയെയും പൊതുജനങ്ങളുടെ സുരക്ഷയെയും ബാധിക്കുമെന്നാണ് വിലയിരുത്തൽ.

പ്രമുഖരുടെ മുന്നറിയിപ്പ്; ആശങ്ക പങ്കുവെച്ച് വിജയ് ശേഖർ ശർമ്മയും അങ്കുർ വരിക്കുവും:  വാട്സ്ആപ്പിന്റെ പുതിയ നീക്കം ഇന്ത്യയെപ്പോലൊരു രാജ്യത്ത് വലിയ ദുരന്തമായി മാറുമെന്ന് പ്രമുഖ സംരംഭകനായ അങ്കുർ വരിക്കു എക്സിൽ (ട്വിറ്റർ) കുറിച്ചിരുന്നു. പ്രമുഖ വ്യക്തികളുടെയും സ്ഥാപനങ്ങളുടെയും പേരുകളോട് സാമ്യമുള്ള വ്യാജ യൂസർനെയിമുകൾ (ഉദാഹരണത്തിന്: warikoo, ankur_warikoo) നിർമ്മിച്ച് ആളുകളെ കബളിപ്പിക്കാൻ തട്ടിപ്പുകാർക്ക് ഇത് എളുപ്പവഴിയൊരുക്കും. വ്യാജ ഗ്രൂപ്പുകളിലേക്ക് ആളുകളെ ചേർക്കാനും പണം തട്ടാനും ഈ ഫീച്ചർ ദുരുപയോഗം ചെയ്യപ്പെടാം. തന്റെ മുഖം ഉപയോഗിച്ച് നിർമ്മിച്ച വ്യാജ എഐ നിക്ഷേപ പരസ്യങ്ങൾക്കെതിരെ മെറ്റയുമായി മുമ്പ് നിയമപോരാട്ടം നടത്തിയ അനുഭവം പങ്കുവെച്ചുകൊണ്ടാണ് അദ്ദേഹം ഈ ആശങ്കയറിയിച്ചത്.

പേടിഎം സ്ഥാപകൻ വിജയ് ശേഖർ ശർമ്മയും ഈ നീക്കത്തെ വിമർശിച്ചു. വെരിഫൈഡ് അക്കൗണ്ടുകൾക്ക് പുറമെ, കാഴ്ച്ചയിൽ സാമ്യമുള്ള ഒട്ടേറെ അൺവെരിഫൈഡ് അക്കൗണ്ടുകൾ വ്യാപിക്കാൻ ഇത് കാരണമാകുമെന്ന് അദ്ദേഹം പറഞ്ഞു. സാധാരണക്കാരായ ഉപയോക്താക്കൾ വെരിഫിക്കേഷൻ ചിഹ്നങ്ങൾ കൃത്യമായി ശ്രദ്ധിക്കാറില്ലാത്തതിനാൽ തട്ടിപ്പുകാർക്ക് ആളുകളെ പറ്റിക്കുന്നത് എളുപ്പമാകും. തട്ടിപ്പുകളും വ്യാജ പരസ്യങ്ങളും തടയുന്നതിൽ മെറ്റയുടെ മുൻകാല പരാജയങ്ങളെ ചൂണ്ടിക്കാട്ടി പ്രമുഖ യൂട്യൂബർ ധ്രുവ് റാഠിയും ഈ പുതിയ അപ്‌ഡേറ്റിനെതിരെ രംഗത്തുവന്നു.

Also read: കണ്ണൂർ ജില്ലയിലെ നഴ്സുമാരുടെ സമരം ഒത്തുതീർപ്പിലേക്ക്

ഫോൺ നമ്പർ വെളിപ്പെടുത്താതെ ആശയവിനിമയം നടത്താം എന്നത് മികച്ചൊരു സ്വകാര്യതാ ഫീച്ചറാണെങ്കിലും, കൃത്യമായ വെരിഫിക്കേഷൻ സംവിധാനങ്ങളും തട്ടിപ്പുകൾ തടയാനുള്ള 'ആന്റി-അബ്യൂസ്' ടൂളുകളും ഇല്ലെങ്കിൽ ഈ ഫീച്ചർ സൈബർ ക്രിമിനലുകളുടെ താവളമായി മാറുമെന്നാണ് വിദഗ്ധർ ചൂണ്ടിക്കാണിക്കുന്നത്. ആഗോളതലത്തിൽ ഉപയോക്താക്കൾക്ക് യൂസർനെയിമുകൾ റിസർവ് ചെയ്യാനുള്ള സൗകര്യം മെറ്റ ഇതിനകം ആരംഭിച്ചിട്ടുണ്ടെങ്കിലും, ഇന്ത്യയിൽ നിലവിലെ സാഹചര്യത്തിൽ ഇതിന് കനത്ത സുരക്ഷാ പരിശോധനകൾ നേരിടേണ്ടി വരും.

Content Highlight: Centre's 'red signal' for WhatsApp username feature: Warning that it could pave the way for huge scams