കണ്ണൂർ ജില്ലയിൽ 117 സ്ഥാനാർഥികൾ നാമനിർദേശ പത്രിക സമർപ്പിച്ചു

കണ്ണൂർ: കണ്ണൂർ ജില്ലയിലെ 11 നിയമസഭാ മണ്ഡലങ്ങളിലായി ആകെ 117 സ്ഥാനാർഥികൾ നാമനിർദേശ പത്രിക സമർപ്പിച്ചു. ചൊവ്വാഴ്ച നാമനിർദേശ പത്രികകളുടെ സൂക്ഷ്മ പരിശോധന നിരീക്ഷകരുടെ സാന്നിധ്യത്തിൽ വരണാധികാരികൾ നടത്തും. മാർച്ച് 26 വ്യാഴാഴ്ചയാണ് നാമനിർദേശ പത്രികകൾ പിൻവലിക്കാനുള്ള അവസാന തീയ്യതി. അതോടെ സ്ഥാനാർഥികളുടെ പൂർണമായ ചിത്രം തെളിയും.

പയ്യന്നൂർ-7, കല്ല്യാശ്ശേരി-9, തളിപ്പറമ്പ്-15, ഇരിക്കൂർ-7, അഴീക്കോട് 11, കണ്ണൂർ-11, ധർമ്മടം-9, തലശ്ശേരി 11, കൂത്തുപറമ്പ്-14, മട്ടന്നൂർ-9, പേരാവൂർ-14 എന്നിങ്ങനെയാണ് പത്രിക നൽകിയ സ്ഥാനാർഥികളുടെ എണ്ണം. കണ്ണൂർ നിയമസഭ നിയോജക മണ്ഡലം യുഡിഎഫ് സ്ഥാനാർഥി അഡ്വ ടി ഒ മോഹനൻ തിങ്കളാഴ്ച വരണാധികാരി ഡെപ്യൂട്ടി കളക്ടർ (ആർ.ആർ) സി ബിജു മുമ്പാകെ നാമനിർദേശ പത്രിക സമർപ്പിച്ചു. പയ്യന്നൂർ മണ്ഡലം യുഡിഎഫ് സ്വതന്ത്ര സ്ഥാനാർഥി വി കുഞ്ഞികൃഷ്ണൻ പയ്യന്നൂർ താലൂക്ക് ഓഫീസിൽ അസി. റിട്ടേണിങ്ങ് ഓഫീസർ ജി സുരേഷ് ബാബുവിനും അഴീക്കോട് മണ്ഡലം യുഡിഎഫ് സ്ഥാനാർഥി അബ്ദുൽ കരീം ചേലേരി ഡെപ്യൂട്ടി കളക്ടർ (എൽഎ) അനീഷിനും തളിപ്പറമ്പ് നിയോജക മണ്ഡലം യു.ഡിഎഫ് സ്ഥാനാർഥി ടി.കെ. ഗോവിന്ദൻ തളിപ്പറമ്പ് തഹസിൽദാർ കെ. സന്തോഷിനും നാമനിർദേശ പത്രിക സമർപ്പിച്ചു. കല്യാശ്ശേരി മണ്ഡലം യുഡിഎഫ് സ്ഥാനാർഥി രാജീവൻ കപ്പച്ചേരി വരണാധികാരി കെ.എൻ ബിന്ദു മുമ്പാകെ നാമനിർദേശപത്രിക സമർപ്പിച്ചു.

kannur