കണിച്ചാർ: കണിച്ചാർ ഗ്രാമപഞ്ചായത്തിന്റെ 2024-25 സാമ്പത്തിക വർഷത്തെ ഓഡിറ്റ് റിപ്പോർട്ട് പുറത്തുവന്നു. വിവിധ പദ്ധതികളിലായി ആകെ ₹18,58,251 (പതിനെട്ട് ലക്ഷത്തി അൻപത്തി എണ്ണായിരത്തി ഇരുന്നൂറ്റി അൻപത്തി ഒന്ന്) രൂപയുടെ ചെലവുകളാണ് രേഖകളുടെ അഭാവം മൂലം ഓഡിറ്റ് വിഭാഗം തടസ്സപ്പെടുത്തിയത്.പ്രധാന കണ്ടെത്തലുകൾ:
രേഖകളുടെ അഭാവം: ബൊക്കാഷി ബക്കറ്റ് വിതരണം (₹3 ലക്ഷം), വീടുകളിൽ റിംഗ് കമ്പോസ്റ്റ് വിതരണം (₹5 ലക്ഷം) എന്നീ പദ്ധതികളിൽ വിതരണ രേഖകളും ഗുണഭോക്തൃ വിഹിതം ശേഖരിച്ച വിവരങ്ങളും ഹാജരാക്കാൻ സാധിക്കാത്തതിനാൽ ഈ തുകകൾ തടസ്സപ്പെടുത്തിയിട്ടുണ്ട്.
മരുന്ന് ലഭ്യതയിലെ കുറവ്:
പാലിയേറ്റീവ് കെയർ, പി.എച്ച്.സി, ഹോമിയോ ഡിസ്പെൻസറി എന്നിവയിലേക്ക് മരുന്ന് വാങ്ങുന്നതിനായി നൽകിയ തുകയിൽ വലിയൊരു ഭാഗത്തിന് മരുന്നുകൾ ലഭ്യമായിട്ടില്ലെന്ന് റിപ്പോർട്ട് ചൂണ്ടിക്കാട്ടുന്നു.
നികുതി പരിഷ്കരണം: ഗ്രാമപഞ്ചായത്തിൽ വസ്തുനികുതി പരിഷ്കരണ നടപടികൾ ഇതുവരെ ആരംഭിച്ചിട്ടില്ലാത്തത് വരുമാന നഷ്ടത്തിന് ഇടയാക്കുമെന്ന് ഓഡിറ്റ് വിഭാഗം മുന്നറിയിപ്പ് നൽകി. 60 ചതുരശ്ര മീറ്ററിൽ കൂടുതൽ വിസ്തീർണ്ണമുള്ള ചില കെട്ടിടങ്ങൾക്ക് നിയമവിരുദ്ധമായി നികുതി ഒഴിവാക്കി നൽകിയതായും കണ്ടെത്തിയിട്ടുണ്ട്.
വാടക കുടിശ്ശിക: പഞ്ചായത്ത് വക കെട്ടിടങ്ങളുടെ വാടക പുതുക്കുന്നതിലും കരാർ നടപടികൾ പാലിക്കുന്നതിലും വീഴ്ചകൾ സംഭവിച്ചിട്ടുണ്ട്.
സാമ്പത്തിക നില:
ആകെ വരവ്: ₹4,22,87,770
ആകെ ചെലവ്: ₹3,91,47,869
മിച്ചം: ₹2,61,01,972 (നീക്കിയിരിപ്പ് ഉൾപ്പെടെ)
പഞ്ചായത്ത് ഭരണസമിതി യോഗങ്ങളുടെ മിനുട്സ് തയ്യാറാക്കുന്നതിൽ മാസങ്ങളുടെ കാലതാമസം നേരിടുന്നത് ആഭ്യന്തര നിയന്ത്രണ സംവിധാനത്തിലെ പോരായ്മയായി റിപ്പോർട്ട് വിലയിരുത്തുന്നു. തടസ്സപ്പെടുത്തിയ തുകകൾ സംബന്ധിച്ച് കൃത്യമായ മറുപടിയും രേഖകളും ഹാജരാക്കാൻ നിർദ്ദേശിച്ചിട്ടുണ്ട്.
Kanichar
.jpeg)
.jpeg)
