പ്രധാനമന്ത്രി നരേന്ദ്ര മോദി നാളെ കൊച്ചിയിൽ

കൊച്ചി: എൻഡിഎയുടെ നിയമസഭാ തെരഞ്ഞെടുപ്പ് കൺവൻഷൻ അടക്കം വിവിധ പരിപാടികളിൽ പങ്കെടുക്കാനായി പ്രധാനമന്ത്രി നരേന്ദ്ര മോദി ബുധനാഴ്ച (മാർച്ച് 11) കേരളത്തിൽ എത്തും. കൊച്ചിയിൽ എത്തുന്ന മോദി കലൂർ ജവഹർലാൽ നെഹ്റു സ്റ്റേഡിയത്തിൽ നടക്കുന്ന എൻഡിഎയുടെ തെരഞ്ഞെടുപ്പ് പ്രചാരണ കൺവെൻഷൻ ഉദ്ഘാടനം ചെയ്യും. പരിപാടിയിൽ അരലക്ഷത്തിലധികം പ്രവർത്തകർ പങ്കെടുക്കുമെന്ന് പ്രതീക്ഷിക്കുന്നതായി ബിജെപി നേതാക്കൾ അറിയിച്ചു.

ബുധനാഴ്ച രാവിലെ 11:30 ഓടെ പ്രധാനമന്ത്രി നെടുമ്പാശ്ശേരി വിമാനത്താവളത്തിൽ എത്തുമെന്ന് ബിജെപി സംസ്ഥാന ജനറൽ സെക്രട്ടറി എസ് സുരേഷ് വാർത്താസമ്മേളനത്തിൽ അറിയിച്ചു. തുടർന്ന് ഹെലികോപ്ടർ മാർഗം മറൈൻ ഡ്രൈവിൽ എത്തുന്ന മോദി അഖില കേരള ധീവര സഭയുടെ സുവർണ ജൂബിലി സമ്മേളനത്തിൽ പങ്കെടുക്കും. പിന്നീട് കലൂർ സ്റ്റേഡിയത്തിനുള്ളിലെ വേദിയിൽ കേന്ദ്രസർക്കാരിൻ്റെ ഔദ്യോഗിക പരിപാടികളിൽ പങ്കെടുക്കുകയും വിവിധ പദ്ധതികൾ പ്രഖ്യാപിക്കുകയും ചെയ്യും. ഇതിനുശേഷം ഉച്ചയ്ക്ക് ഒരുമണിക്കും ഒന്നരയ്ക്കും ഇടയിൽ എൻഡിഎ കൺവെൻഷനിലേക്ക് എത്തുമെന്നും എസ് സുരേഷ് വ്യക്തമാക്കി.

Narendramodi